Gen reprezay lè yon konpayi (sa gen ladan l manadjè, sipèvizè, direktè, oswa lòt moun posib) revoke yon anplwaye oswa poze nenpòt lòt kalite aksyon negatif kont yon anplwaye paske l patisipe nan aktivite ki pwoteje yo.

Yon aksyon negatif se nenpòt aksyon ki ta ka anpeche yon anplwaye rezonab pou l pataje enkyetid li genyen konsènan yon vyolasyon posib oswa patisipe nan lòt aktivite ki pwoteje. Reprezay kapab gen enpak negatif sou moral anplwaye a an jeneral.

Rapòte reprezay ka mennen nan yon lòd ki sot nan ajans oswa tribinal ki mande yon konpayi pou l sispann fè reprezay. Rapòte reprezay ka ede travayè yo jwenn salè yo dwe yo, dedomajman lajan, ak/oswa solisyon ki ka ede yon travayè reprann li nèt apre reprezay la.

Ou gen dwa pwoteksyon kont reprezay kèlkseswa estati imigrasyon w. Reprezay ki baze sou estati imigrasyon gen ladan l aksyon tankou menas pou rele otorite imigrasyon yo, yon demann pou yon nouvo dokiman verifikasyon travay I-9 oswa nimewo Sekirite Sosyal, ak efò konpayi a pou l rele lapolis epi enplike otorite imigrasyon yo. Gen kèk sitiyasyon kote estati imigrasyon ka fè gen limit nan solisyon w ap ka jwenn si konpayi w ap travay la fè reprezay ki ilegal kont ou.

Lalwa federal pwoteje minè kont reprezay pou egzèsis dwa yo anba Lwa sou Min.

• Pou w rapòte reprezay lè w ap mande salè minimòm, lè siplemantè, oswa lòt dwa ki tonbe anba Biwo DOL ki Responsab Salè ak Lè a, ou ka rele nan 1-866-487-9243 oswa ale sou www.dol.gov/agencies/whd. (Gade definisyon ak egzanp reprezay epi li plis enfòmasyon konsènan pwoteksyon travayè kont reprezay).
• Pou w rapòte reprezay ki asosye ak dwa w pou w nan yon espas travay ki an sekirite e ki an sante, ou ka depoze yon plent ak OSHA nan espas 30 jou aksyon defavorab nan travay la kont ou a lè w ale oswa rele yon lokal biwo OSHA nan 1-800-321-OSHA (6742). Oswa ou ka depoze yon plent lè w voye yon plent alekri bay OSHA rejyonal ki pi pre a oswa biwo nan zòn nan, oswa lè w depoze yon plent anliy sou www.whistleblowers.gov/complaint_page.html. (Jwenn Fèy Enfòmasyon OSHA a sou Fason pou w Depoze Plent pou W Denonse).
• Pou w rapòte reprezay ki gen rapò ak diskriminasyon nan travay, ou ta dwe koontakte biwo EEOC ki toupre w la oswa rele 1-800-669-4000. Met sou sa, ou ka ranpli yon evalyasyon anliy sou http://www.eeoc.gov/employees/howtofile.cfm. Sei konpayi w ap travay la se yon kontraktè oswa soutretan federal, ou ka kontakte Pwogram Biwo Respè Kontra Federal yo nan (1-800-397-6251).
• Pou w rapòte reprezay ki gen rapò ak dwa w pou w òganize ak kòlèg ou oswa dwa w pou w kreye yon sendika oswa konsènan yon òganizasyon travay, ou gen plizyè opsyon. Ou ka rele liy enfòmasyon gratis la nan 1-844-762-NLRB (6572). Ou ka ale tou nan yon biwo NLRB nan zòn ou pandan lè yo abitye ouvri. Ou ka jwenn yon lis ki gen biwo NLRB ak enfòmasyon pou w kontakte yo ak lè yo ouvri, ak enfòmasyon sou fason pou w depoze yon akizasyon. Epi ou ka depoze yon akizasyon pa mwayen elektwonik sou sit entènèt NLRB a.
• Pou w rapòte reprezay ki gen rapò ak dwa w antanke yon ansyen militè oswa yon manm sèvis, ou ka kontakte Depatman Sèvis Travay ak Fòmasyon pou Ansyen Militè Ozetazini (VETS) nan 1-866-237-0275 lendi rive vandredi, 8a.m. rive 8p.m. ET oswa ale sou sit entènèt li a sou www.dol.gov/agencies/vets. Ou ka jwenn yon Konseye USERRA pou w kominike sou webapps.dol.gov/elaws/userra.htm. (Aprann plis konsènan dwa ki kouvri dapre USERRA. Ou ka kontakte tou Pwogram Biwo Respè Règleman Kontra Federal la (1-800-397-6251).

Asistans an dirèk disponib lendi rive vandredi soti 8:00 a.m. rive 8:00 p.m. Lè nan Lès lè w rele, 1-866-4-USA-DOL (1-866-487-2365). *Si w se yon moun soud, ou tande di, oswa ou gen andikap pou w pale, tanpri peze 7-1-1 pou w gen aksè ak sèvis transmisyon telekominikasyon yo.